曼聯玩拉「布」「讓和」啱數

　　喺歐聯H組2戰全勝嘅曼聯，今晚主場迎戰葡超布拉加，為免夜長夢多，肯定全力求勝。佢哋一對射手拍檔尹佩斯同朗尼近排默契愈嚟愈好，要入波多多都有，可惜係球隊後防繼續牙煙，今晚仲隨時會收起老將里奧費迪南，睇怕難免有失波。睇番之前2場歐聯紅魔都係小勝一球，加上之後要應付英超同車仔嘅榜首大戰，今場隨時照辦煮碗

　　吸收過上屆歐聯分組賽出局教訓，紅魔鬼今屆賽事一開始就打醒精神連贏2場，加上朗尼近排都重拾射門鞋，連國際賽近3場入咗5球，佢同新兵尹佩斯嘅默契持續增加，二人之間共炮製咗3次助攻，仲要有快翼艾舒利楊格都已經傷愈候命，火力全面提升，進攻唔使愁啦！

　　況且尋日英國傳媒《Metro》仲話，馬體會準備向曼聯收購查維亞靴南迪斯，事關佢哋諗緊賣走法卡奧套現喎，「小豌豆」梗係搏命操波希望有得出場爭取轉飯鑊，其他紅魔前鋒畀佢一逼，實加多兩錢肉堅啦。

　　力奇一向唔懷疑曼聯嘅實力，不過呢期紅魔鬼條防線似乎幾唔穩陣，近3場主場戰竟然失咗6球之多，睇嚟喺隊長尼曼查維迪復出之前，都咪抱太大信心。更大鑊係，老將里奧上周末聯賽唔肯着件反歧視T恤，搞到得罪費Sir，傳聞今仗會被掟入雪櫃！無疑令條防線雪上加霜，難保不失。

　　布拉加呢邊，話晒都係葡超3強之一，實力差極有個譜。佢哋近7場歐戰作客不敗，近5次對戰英格蘭球隊都未輸過，話晒今晚強陣出擊，就算唔夠砌，對住有後顧之憂嘅曼聯輸一球都係正波囉。